Сирли сен, чайқал, эй гўзал дилбар,
Шўх ва ўйноқ қиз альбоми янглиғ.
Кўкрагингда ҳаёт деган ошиқ,
Кўп аср сайраган ва тўккан зар. 

Men dutor birlan tug'ishg'on,ko'hna bir devonaman,
Ul tug'ishqonim bilan bir o'tda doim yonaman.

Dillarida g'am to'la bechoralarga yorman,
Vaqti xush,g'am ko'rmaganlardan tamom bezorman.

Ko'ngildagi muhabbatning uchqunin
Xayolimning bir burchida berkitdim.
Ul uchqunning kuchligidan siynamda
Hech tuzalmas, og'ir yara bor etdim.

Ber qo'lingni, shu titragan qo'lim bilan so'ng daf'a
Bir qisayin, so'ngra ortiq u qo'llarga tegmak yo'q.
Ko'zlaringni so'nggi marta tushir xira ko'zimga,
Ko'kragimga kipriklaring so'ng martaba otsin o'q.

Muhabbatning saroyi keng ekan, yo'lni yo'qotdim-ku,
Asrlik tosh yanglig' bu xatarli yo'lda qotdim-ku.

Karashma dengizin ko'rdim, na nozlik to'lqini bordir, 
Halokat bo'lg'usin bilmay, qulochni katta otdim-ku.

Go'zallarning malikasi ekansan,
Buni sening ko'zlaringdan o'qidim.
O'qidim-da istiqbolim qushiga
Xayolimdan oltin qafas to'qidim.

Ko'nglimda yig'lagan malaklar kimlar? 
Sharqning onalari, juvonlarimi? 
Qarshimda yig'lagan bu jonlar kimlar? 
Qullar o'lkasing insonlarimi?

Ey qorong'i uzun qishning hayoli
Ko'klam chog'i ko'zlarimda o'ynama!
Ayriliqning chidab bo'lmas maloli
Ko'klam, maysa yuzlarida qaynama!

Binafsha senmisan, binafsha senmi,
Ko'chada aqchaga sotilgan.
Binafsha menmanmi? binafsha menmi,
Sevgingga, qayg'ungga tutilgan?

Qorong'u kechada ko'kka ko'z tikib,
Eng yorug' yulduzdan seni so'raymen. 
Ul yulduz uyalib, boshini bukib, 
Aytadir:"Men uni tushda ko'ramen. 
Tushimda ko'ramen, shunchalar go'zal, 
Bizdan-da go'zaldir, oydan-da go'zal!