Qaro qoshing, qalam qoshing,
Qiyiq qayrilma qoshing, qiz.
Qilur qatlima qasd qayrab —
Qilich qotil qaroshing, qiz.

Qafasda qalb qushin qiynab,
Qanot qoqmoqqa qo`ymaysan.
Qarab qo`ygil qiyo,
Qalbimni qizdirsin quyoshing, qiz.

Garchi shuncha mag`rur tursa ham,
Piyolaga egilar choynak.
Shunday ekan, manmanlik nechun,
Kibru havo nimaga kerak?

Kamtarin bo`l, hatto bir qadam
O`tma g`urur ostonasidan.
Piyolani inson shuning-chun
O`par doim peshonasidan.

Erkin Vohidov (1936–2016)

Zahiriddin Muhammad Bobur (1483–1530)

Alisher Navoiy buyuk shoir va mutafakkir (1441-1501)

Ko'nglum tilagi visol emishtuk, bildim,

Ul vasl dog'i mahol emishtuk, bildim.

Har qandaki bo'lsa mehribondur, der edim,

Ul dog'i g'alat xayol emishtuk, bildim.

 ***

Zulfig'a ko'ngul qo'yub, parishon bo'ldum

Ko'z oldurubon yuziga, hayron bo'ldum.

Chin dey senga, Boburoki, oshiqliqda,

Har neki qilib edim – pushaymon bo'ldum.

 ***

Husnung sifatini eshitib zor o'ldum,

Ko'rmay seni ishqingg'a giriftor o'ldum.

So'rg'ilki, labing firoqi behol etti,

Ko'rgilki, ko'zung hajrida bemor o'ldum.

 ***

Hijronda, sabo, yetti falakka ohim,

Gar ul sori borsang, budurur dilxohim –

Kim, arzi duo niyoz ila qilg'aysen,

Gar so'rsa men xastani Gulrux, Mohim.

 ***

Yillar tilab, ishni qobu saqlab turdum,

Yuz jahd bila ishni munga yetkurdum.

Mardona bo'l, emdi yaxshidur ish kelishi,

Tengriga seni, elni senga topshurdum.

So‘rma holimniki, bo‘ldum burnog‘idin zorroq,

Jism jondin zoru jonim jismdin afgorroq.

Banda taqrir aylay olmon band-bandim dardini,

Yuz temur band o‘lsa, ondin bu erur dushvorroq.

Mastu bexudluq bila umrungni o‘tkarding, darig‘,

Ey ko‘ngul, mundin beri bo‘l bir nima hushyorroq.

G‘aflat uyqusidin uyg‘on, gar tilar bo‘lsang murod,

Kim, yetar maqsadg‘a har kim, bo‘lsa ul bedorroq.

O‘lgali yettim, mening jonim g‘amidin, ey rafiq,

Dahr aro chun yo‘q kishi sendin manga g‘amxorroq.

Kelmas o‘xshar zaxmating islohg‘a, Bobur, magar,

Har davokim qildilar bo‘ldung dag‘i bemorroq.

Necha davron g‘ussasi bo‘lg‘ay mening jonimg‘a xos,

Koshki o‘lsam, dog‘i bu g‘ussadin bo‘lsam xalos!

Ohu vovaylo – surudum, dardu g‘am – hamsuhbatim,

Boda – ashkim qoni, kim ko‘rdi muningdek bazmi xos?

Gar shikastim bo‘lsa sust ag‘yordin, ta’n etmangiz –

Kim, shikastig‘a sabab almosning bordur rasos.

Oshiq o‘lg‘och, bexudu devona bo‘ldum, bilmadim –

Kim, pari ruxsoralar ishqiga bu ermish xavos.

Xublarni ko‘z ko‘rub, qon qildi Bobur bag‘rini,

Emdi ko‘zdin qon to‘karmenkim, budur anga qasos.

Qaro ko'zum, kelu mardumlug' emdi fan qilg'il,

Ko'zum qarosida mardum kibi vatan qilg'il.

Yuzung guliga ko'ngul ravzasin yasa gulshan,

Qading niholig'a jon gulshanin chaman qilg'il.

Takovaringg'a bag'ir qonidin hino bog'la,

Itingg'a g'amzada jon rishtasin rasan qilg'il.

Firoq tog'ida topilsa tufrog'im, ey charx,

Xamir etib yana ul tog'da ko'hkan qilg'il.

Yuzung visolig'a yetsun desang ko'ngullarni,

Sochingni boshdin-ayog' chin ila shikan qilg'il.

Xazon sipohiga, ey bog'bon, emas mone'

Bu bog' tomida gar ignadin tikan qilg'il.

Yuzida terni ko'rub o'lsam, ey rafiq, meni

Gulob ila yuvu gul bargidin kafan qilg'il.

Navoiy, anjumani shavq jon aro tuzsang,

Aning boshog'lig' o'qin sham'i anjuman qilg'il.